Dende
la Xunta Estudiantil Asturiana vemos necesario denunciar un nuevu
episodiu na mercantilización de la educación pública, cola apaición d'un
seguru priváu ufiertáu pola Universidá d'Uviéu nel momentu de facer la
matrícula.
El
mesmu, "en collaboración" con Universia -propiedá del Bancu Santander-,
ufre un seguru de la entidá Allianz pa la continuidá de los estudios en
casu de desempléu, invalidez y otres circunstancies asemeyaes,
llantando asina'l negociu priváu nes tramitaciones de la matrícula na
nuesa universidá pública.
Dende la XEA consideramos inaceptable que la Universidá d'Uviéu siga permitiendo la entrada, cada vegada mayor, del sector priváu, yá representáu n'órganos d'importancia como'l conseyu social responsable de normatives bien criticaes pola sociedá como'l Reglamentu de Permanencia.
Consideramos
que la Universidá d'Uviéu, como institución pública que ye, debería
garantizar a tolos y toles estudiantes poder facer los sos estudios
independientemente de les sos dificultaes económiques, debiendo
garantizase en tou casu con dineru públicu que les persones con menos
recursos puean estudiar. Poro, la presencia del sector priváu nestes
cuestiones namái amuesa les carencies de la nuesa universidá, y la falta
d'oportunidaes que provoca.
Siguiremos
polo tanto sollertes a esti tipu de movimientos, escontra los que'l
movimientu estudiantil tien que siguir reaccionando con contundencia pa
defender un enseñu asturianu públicu y de calidá.
