Dende
la Xunta Estudiantil Asturiana, como estudiantes pero tamién como
asturianes y asturianos, nun podemos quedar ayenos a una fecha destacada
nel nuesu país, como ye’l 8 Setiembre. Menos entá podemos escaecela
cuando la situación nel enseñu públicu asturianu nun dexa d’empiorar añu
a añu.
La
Universidá d’Uviéu nun dexa d’esperimentar nos caberos años una mengua
notable de beques y una medría de les tases, que tán faciendo inviable
siguir o entamar colos sos estudios a munches y munchos estudiantes.
Como bona amuesa ta un reglamentu de permanencia qu’espulsa a más de mil
estudiantes de la universidá pública, un bon reflexu de la constante
mercantilización que sufre esta institución dende cuantayá, pola so
propia aición, y poles imposiciones de marcos como’l Plan Boloña, y les
sos continuaciones como’l 3+2.
Na
escuela pública, los presupuestos nun dexen de menguar y con ello les
plantiyes d’interinos, o les condiciones materiales nes que se dan les
clases. Denunciamos tamién nesta estaya’l continuísmu nes polítiques de
represión y marxinación a la llingua asturiana y el gallego-asturiano,
común a tolos niveles educativos, tanto obligatorios como superiores
–incluyía la Universidá-. Queremos un enseñu públicu, de calidá, y
respetuosu cola nuesa realidá como nación.
Poro,
dende la Xunta Estudiantil encamentamos a participar nes actividaes
alternatives entamaes col llema #LluchandoPolaSoberanía n’Uviéu, pa
siguir na llucha por tresformar Asturies, y un modelu educativu
alcordies a ello.
POR UN ENSEÑU ASTURIANU Y POPULAR
