Nos caberos años asistimos a la progresiva precarización y esmantelamientu de los distintos servicios públicos. Aquello que se suponía que tenía de tar blindáu como garantía d'una mínima igualdá d'oportunidaes y xusticia social foise tarazando de forma progresiva, de la que la desigualdá convertíase en norma llegando España a ser el segundu estáu más desigual de la XE dempués de Letonia.La educación y en concretu la Universidá nun fueron una esceición. La implantación de midíes como la tasa de reposición d'una persona por cada diez xubilaciones, la vertixinosa xubía de les tases académiques, l'amenorgamientu de beques, l'endurecimientu de les condiciones académicu y económicu pa llograles, l'amenorgamientu del presupuestu de la Universidá y del so porcentaxe de financiamientu públicu y el restrictivu Réxime d'Estancia qu'espulsa a miles d'estudiantes van conformando de forma progresiva pero cada vegada más nítida una Universidá na que solo tienen cabida aquellos que puen pagalo ente que les capes populares de la sociedá son escluyíes.A tolo anterior amiestase-y dos ataques dafechu y enforma graves a la educación superior, con una casuística especial qu'afeuta a la nuesa Universidá y queremos destacar.Per un llau, el Conseyu de Ministros aprobó la enésima reforma del seutor educativu, de forma autoritaria y ensin cuntar cola comunidá educativa, que supón una vuelta de tuerca na elitización de la educación cimera. El 3+2 supón una devaluación de los Graos y un encarecimientu brutal del costu total de los estudios universitarios. Cuando col modelu 5+0 pagábamos 5.000 €, agora col 3+2 vamos pagar polo mesmo casi 14.000€. Amás l'estáu español ye ún de los estaos europeos onde más cuesta'l creitu de máster respeuto al de grau. Pensamos qu'esta midía ye la estensión d'un plan integral de retrocesu nos drechos y llibertaes que, nel ámbitu educativu materializóse cola LOMCE n'enseñances primaries y medies y agora con esti decretu na educación superior.Per otru llau, les y los estudiantes de la Universidá d'Uviéu asistimos anguaño a daqué que llevábemos tiempu sollertando: la espulsión de 1099 compañeres y compañeros (lo que supón un 6.6% del estudiantáu de la nuesa Universidá) por mor del inaceutable y restrictivu Réxime de Permanencia, que, so criterios economicistes miqueros pon una llente xigante sobre'l rendimientu académicu del estudiantáu produciéndose espulsiones absurdes ya inxustificaes. Ye más sangrante entá si tenemos en cuenta qu'esti Réxime encamiéntase y aplícase dende una institución (el Conseyu Social) al nuesu xuiciu illexítima, puerta d'entrada de los intereses empresariales na Universidá, onde empreses, sindicatos y partíos políticos tienen más poder que la mesma Universidá na aprobación de presupuestos y riegles como éstes tan fundamentales pa la institución. La Universidá nunca ye un gastu a lo xole, sinón una inversión de futuru, y espulsar a cientos d'estudiantes en nengún casu fai aforrar recursos públicos, ye más, piérdense miles de € en tases. Ye especialmente llamativu que se ponga l'acentu del usu eficiente de recursos públicu nesti aspeutu al tiempu que se marafundien millones d'euros nos sobrecostos de macro-obres.Esto, pa les y los estudiantes, pa la comunidá universitaria y l'educativa polo xeneral y pal conxuntu de la sociedá asturiana ye inaceutable y nun podemos quedanos impasibles y siltentes mirando como destrúin el motor inteleutual, científicu, académicu y económicu de Asturies. Poro, los coleutivos universitarios (Asamblees Abiertes d'Estudiantes de la Universidá d'Uviéu, Xunta Estudiantil Asturiana y CCOO Universidad) entamamos una manifestación el día 25 de Febreru a les 18:30 dende la estación de tren d'Uviéu hasta l'Edificiu Hestóricu de la Universidá d'Uviéu, que va tar sofitada por delles organizaciones del seutor educativu asturianu (CSI Enseñanza, SUATEA, Sindicato de Estudiantes, Movimientu Social pola Escuela Pública d'Asturies) y de la sociedá asturiana encadarmada (22M Asturies, Asamblees de Trabayadores en Llucha, Plataforma Feminista d'Asturies y Plataforma d'Afectaos pola Hipoteca-Uviéu).¡¡EL NUESU FUTURU COMO SOCIEDÁ TÁ EN XUEGU!!¡¡PÚBLICA NOS LA DEXARON Y PÚBLICA VAMOS DEVOLVELA!!
