Les
estudiantes d'Asturies tenemos munches agresiones del poder que
valtiar, asina como muncho que siguir construyendo. La LOMCE, llexislada
y pensada dende Madrid, sigue imponiéndose o dexándose d'imponer
n'Asturies con total sumisión del gobiernu asturianu, y ensin atender
nenguna de les reivindicaciones que dende l'estudiantáu, el profesoráu, y
les más y pás, vienen faciéndose en refugu d'esta llei mercantilizadora
y aculturizadora.
Esta
LOMCE, y en concretu les reválides, son la cuestión principal que
motiva la fuelga entamada a nivel estatal pol SE. Y anque podemos tar
d'alcuerdu nel "eslogan" de refugalo, a poco qu'afondemos atopamos
diferencies fonderes:
1)
Dende la XEA puxamos por un enseñu fechu y pensáu pol pueblu asturianu y
pal pueblu asturianu, y anque nun negamos qu'unes lleis educatives feches pol Estáu español pueden ser meyores qu'otres, el nuesu enfotu ta en construyir
un enseñu asturianu, llibre d'élites que faigan y desfaigan en perxuiciu'l pueblu.
2)
Por muncho que valtiemos "lleis franquistes", nun va haber nenguna
reforma especialmente bona dientro de la lóxica capitalista. La
educación nel capitalismu enxamás va ser igualitaria, emancipadora,
participativa... poro, la crítica de fondu al sistema económicu y
políticu paeznos fundamental.
3)
Fuelgues aleatories, feches por cumplir l'espediente anual d'actividá, y
que nun cunten cola totalidá del texíu estudiantil asturianu, faen más
mal que bien a una ferramienta irrenunciable como ye la fuelga. Una
vegada más, nun podemos tar d'alcuerdu coles formes de convocatoria nin
cola estratexa xeneral de la organización convocante: insistimos na
necesidá de construyir movimientu estudiantil plural, de base y diariu.
Con
too ello, xunto coles reivindicaciones que van más allá de la propia
LOMCE (les carencies esistentes na nuesa universidá, na FP... siguen
tando ehí y precisando de tratamientu), creyemos dende la XEA que la
movilización nunca sobra, pero fadrémoslo de forma crítica.
En
coherencia con ello, dende la Xunta Estudiantil Asturiana participamos y
sofitamos el Bloque Críticu Estudiantil convocáu pa la manifestación
del miércoles 26 a les 12:00 na Plaza España d'Uviéu. Esti bloque
ye frutu del trabayu conxuntu de delles organizaciones y persones que
xuntamos les nueses fuercies baxo una marca común, y baxo un llema bien
claru ("La educación nun se llexisla, conquístase"), va tar glayando nes
cais uvieínes contra la educación capitalista, y por un movimientu
estudiantil de base y verdaderamente combativu.
Nesi
sen, entendemos que ye perimportante que, amás de siguir col nuesu
propiu camín como organización y como proyeutu discursivu, axuntemos
esfuercios baxo un programa de mínimos con toes aquelles dimpuestes a
facer qu'estes premises anticapitalistes y de base seyan mayoritaries.
Esti
26 d'Ochobre, vémonos nes cais: movilizámonos críticamente pa siguir
construyendo una educación y un movimientu estudiantil, asturianu y
popular.
BLOQUE CRÍTICU ESTUDIANTIL
Yá nun ye un rumor llonxanu: la LOMCE llegó,
condergando a los fíos de la clase trabayadora a un enseñu retrógradu y
cada vegada más recortáu.
Eso los que pasen de cursu: otros
tantos van echalos a pataes del sistema educativu, por nun adaptase a un
modelu que te fae obedecer y memorizar, non pensar por ti mesmu. Pero,
aprobando o non, el destín ye’l mesmu: un mercáu llaboral de xóvenes
precarios y sumisos a les grandes empreses. Mentanto l’asturianu, sigue
arrequexáu nun caxón, por ciertos poderes que prefieren que falemos
l’idioma de la Troika que’l de nueso.
Asina son les coses,
pero eso nun quier dicir que nun puean camudar. Les estudiantes nun
deberíemos quedanos de brazos cruzaos ante esti nuevu ataque
del capitalismu más xabaz. Los derechos qu’anguaño tenemos nun cayeron
del cielu, conquistáronse na cai, y tamién ellí habrá que defendelos.
Nun somos otru puntu con graduáu d’EXB pidiéndote que t’afilies a un
coleutivu de diez sigles: somos rapaces, como tu, qu’estudien y que
trabayen, que saben que’l nuesu futuru ta colgáu d’un filu, y que fae
falta lluchar por él. Tu yes quien fae’l cambiu, nun necesites que naide
te lo diga
-Por un movimientu estudiantil de base y combativu
-Escontra la educación capitalista
¡Por mín, por ti, por toos!
26 d’ochobre
-12:00 Entamu de la mani na Plaza España d'Uviéu, ¡busca la nuesa pancarta!