Dende
la Xunta Estudiantil Asturiana consideramos el 1º de Mayu como una
fecha más na que los y les estudiantes tenemos que salir a la cai a
reivindicar: somos estudiantes, pero tamién somos clase obrera, y nun
somos ayenes a la precaria realidá qu'anguaño vivimos nel nuesu país.
El
modelu educativu que nos imponen nun va empobináu al nuesu
arriquecimientu intelectual, nin a afitar un pensamientu críticu: ye una
fábrica fecha a midida de les esixencies empresariales, y por si esto
fuera poco, la escuela y universidá pública ta acaldía más precarizada y
amenazada polos retayos y la falta de recursos.
Dende
la XEA paeznos por too ello perimportante que les y los estudiantes
sigamos trabayando a diariu nos centros d'estudiu y nes cais dende les
reivindicaciones estudiantiles, pero tamién confluyendo col restu de
lluches y movilizaciones del conxuntu de la clase obrera asturiana.
Poro, llamamos a participar na manifestación entamada por CSI, CGT y SUATEA, na que vamos formar parte del bloque #LluchandoPolaSoberanía,
¿y por qué? Porque defendemos que ye'l pueblu asturianu el que tien que
construyir, definir y desendolcar el so propiu modelu educativu, y esto
namái ye posible si tenemos un marcu concretu y necesariu: la soberanía.
OBRERES Y ESTUDIANTES, XUNTES Y P'ALANTRE
TESTU DE CONVOCATORIA DEL BLOQUE SOBERANISTA:El día 1 de mayu torna un añu más a ser una fecha na que, amás de facer alcordanza, hai muncho que reivindicar per parte la clase obrera asturiana. Dende l’últimu añu vemos cómo les condiciones llaborales y sociales nun ameyoraron un res: por más que mos quieran vender “brotos verdes” y “recuperación”, la realidá ye que’l paru, la precariedá, y la falta de futuru siguen siendo la realidá predominante pal nuesu pueblu.
Por si esto fuere poco, vemos cómo les condiciones de vida empioren: la mitá de les paraes y paraos d’Asturies yá nun perciben nengún tipu de sofitu económicu dende les instituciones, faciendo espoxigar el númberu de persones que dependen de la caridá pa poder subsistir. Nesi sen, ye yá casi un terciu de la nuesa población la que ta en riesgu de cayer baxo l’umbral de la probitú, mentanto selmana a selmana siguimos conociendo casos de despidos y pieslles empresariales, desagospios, y otres llaceries asemeyaes.
Con too ello, ye evidente qu’esti nun ye nin el presente nin el futuru que queremos p’Asturies: nun queremos tar sumíes nel paru perpetuu, como tampoco queremos trabayos temporales y precarios, nos que más que trabayar pa vivir, vivimos pa trabayar. Queremos facer hores estra, pero de vida. Queremos unes vides dignes nes que los nuesos derechos y necesidaes básiques tean garantizaes, cuestión que nesta Asturies capitalista y sometía dafechu a los dictaos d’estructures estatales y supraestales que nun mos representen, ye una utopía.
Reivindicamos nesti 1 de mayu la soberanía pal pueblu asturianu, pa la clase trabayadora del nuesu país. Por un marcu nel que podamos y debamos decidilo too, nel que nun seyamos rehenes del capital y del Estáu español, sinon namái protagonistes de les nueses vides y del nuesu país. Pola reindustrialización, pola vertebración del conxuntu d’Asturies, pola defensa de les zones rurales y les sos actividaes económiques, y en definitiva por un porvenir nel que nun mos obliguen a marchar pa poder ganar el pan.
Ye por ello qu’esti 1u de Mayu, llamamos a participar na manifestación del sindicalismu combativu entamada por CSI, CGT y SUATEA a les 12:00 dende la Plaza L’Umedal, dientro’l bloque #LluchandoPolaSoberanía, pa siguir puxando polos nuesos derechos, por otru modelu pal nuesu país, pola nuesa dignidá.
