Na educación, como nel restu la nuesa sociedá, la cuestión de xéneru ye imprescindible pa
entender bona parte de les problemátiques a les que nos enfrentamos.
Nel enseñu públicu asturianu, son evidentes les carencies nesta
cuestión, que malapenes tien sitiu nos conteníos de práuticamente tolos
niveles educativos.
Anguañu
vemos como la representación de muyeres con cargos de decisión nel
sistema educativu ye puramente irrisoria, o nel meyor de los casos tan
reparties nos cargos con menor poder. Esta representación vese aminorgá
segun vamos subiendo n'escala de poder, entamando poles estudiantes y
los colectivos estudiantiles onde la representación de la muyer ta nuna
situación casi d'igualdá, pero que va baxando muncho según falamos de
profesores, caderalgues, decanes, directores, rectores y demás muérganos onde la muyer ya nun tién ni siquiera representación.
Dende la Xunta Estudiantil Asturiana atalantamos qu'un 8 de marzu más tenemos que reivindicar el feminismu, como una ferramienta útil y necesaria a tolos niveles. Especialmente nuna educación patriarcal como la nuestra onde ye evidente la reproducción de roles de xéneru perxuiciosos a nivel d'alumnáu dende'l mesmu momentu nel qu'escoyemos rama d'estudios ya dende la secundaria, y onde les desigualdaes a nivel docente son patentes. Apostamos por empoderanos
en toles ferramientes de llucha y reivindicación p'algamar la
desapaición de la imaxe d'home cisexual como máximu esponente, tanto pa
l'alumnáu como pal profesoráu, col sofitu precisamente de quienes
disfrutamos d'estos privilexos, sabiendo reconocelos per un llau, y per
otru siendo capaces d'identificar estos privilexos quienes nun los
tenemos
Tamién
ye destacable como se siguen reproduciendo agresiones machistes,
actitudes discriminatories y sexistes dientro de la educación, ente
colectivos d'iguales o ente persones con distintu poder. Podemos ver a
diariu episodios desagradables désti tipu ente alumnes, ente profesores y
alumnes, profesores y profesores y ente casi tolos cargos de la
comunidá educativa.
Too esta discriminación que vemos, nun se aplica namái a les muyeres heterosexuales, sinon que la integración y la inclusión en condiciones d'igualdá y de respetu, de toes aquelles persones que nun sean homes cis queda arrequexada fuera d'esti sistema educativu. Vemos a diariu como les persones LGTB+ son discriminaes, rechazaes y en munchos casos condergaes na escuela, nos institutos y na universidá.
Dende
la nuesa parte como estudiantes dientro d'esti sistema educativu
patriarcal, vemos como ye necesario texer redes de sofitu ente
estudiantes pa defendemos de toes estes agresiones y actitudes
machistes, faciendo por denuncialo, da-y visibilidá y combatilo, siendo esta manera la unica forma d'intentar acabar con esta lacra nel sistema educativu.
Lluchamos
por un enseñu públicu que, ente otres coses, seya igualitariu y
emancipador a tolos niveles, y polo tanto tamién a nivel d'identidá de xéneru
Queda muncho por avanzar nesta xera, pero dende l'estudiantáu
soberanista d'Asturies paeznos imprescindible que nun quede nel escaezu,
nin el 8 Marzu, nin el restu de díes del añu.
Compañeres
y compañeros, agora más que nunca, qu'entamamos a ser capaces de
señalar ensin culpabilidá a quien mos acosa, agora que lleemos nes
muries que nun apaecemos muertes sinon que somos asesinaes. Agora que tamos cada
día más concienciaes y concienciaos, dempués d'oyir que "lo podíamos
haber evitado", ¡non¡ Querémonos vives, actives y en llucha. Queremos acabar con esti sistema que conderga a la muyer.
Que del caricós ta reñaciendo la nuesa hestoria, esto ye l'entamu de la llucha de les muyeres y los homes llibres
