Día de la llingua materna: por un enseñu
asturianu llibre d’aculturación
Tolos 21 de febreru ye una fecha d’especial
reivindicación pa los y les falantes de les llingües del mundu, y especialmente
d’aquelles minorizaes: ye’l Día Internacional de la Llingua Materna.
N’Asturies, otru añu más, nun podemos facer
otra cosa que siguir denunciando cómo nun s’ufre un enseñu que respete y
promueva por igual la educación nes llingües maternes de los y les escolines
d’Asturies, yá dende los primeros ciclos educativos, y siendo asina fasta que
finamos d’estudiar.
L’asimilación activa del castellán nos
primeros compases de la educación ye un elementu clave na represión
llingüística que siguimos careciendo nel nuesu país, y esto, amás d’intolerable
pola violación de drechos que supón, nun mos diz otra cosa que la urxente
necesidá de dá-y la vuelta a esti sistema educativu caducu y aculturizador.
Dende la Xunta Estudiantil Asturiana, nun día
como ésti, reivindicamos la importancia de la llucha por un enseñu que puxe pol
asturianu y el gallego-asturiano como llingües vehiculares, cuestión decisiva
pa la tresmisión y caltenimientu del idioma nes edaes más tempranes. Nesi sen,
frente a esta reivindicación, lo que vemos güei ye que nin siquier se garantiza
la ufierta de l’asinatura d’asturianu y gallego-asturiano na configuración
actual del sistema educativu, polo que’l camín a percorrer pa llegar fasta lo
que reivindicamos, ye entá llargu.
Sicasí, como estudiantes y como asturianes y
asturianos, paeznos que ye’l nuesu deber nun parar de denunciar los atropellos
nel sistema educativu pa col nuesu patrimoniu llingüísticu, y siguir
construyendo les propuestes alternatives pa una educación pública, asturiana y
de calidá, na que’l respetu y promoción de la realidá cultural y social del
nuesu país tien de ser un finxu irrenunciable.
