Dende la Xunta Estudiantil Asturiana queremos denunciar públicamente l'actitú discriminatoria d'esti señor non solo hacia los asturfalantes, sinón hacia los asturianos en xeneral. Ye intolerable qu'en plenu sieglu XXI se sigan permitiendo estos comportamientos na Universidá d'Uviéu, nos qu'amás de faltar al respetu, pretenden dase lleiciones d'un civismu del qu'el personaxe en cuestión carez. El que diz llamase "filólogu" ye incapaz d'articular una frase ensin llenala d'improperios y vexaciones.
¿Ye esti'l nivel que queremos na Universidá d'Uviéu? La respuesta ye NON. Nun queremos una Universidá de "puestinos", onde l'únicu méritu del personal seya ser fíu o pariente de tal. Nun queremos una Universidá que discrimine a los estudiantes pola so llingua materna. Nun queremos una Universidá que reniegue de la cultura y les llingües d'esti país. Nun queremos "filólogos" que nun sepan lo que ye la filoloxía. Nun queremos una Universidá que permita que personaxes como Miguel Alarcos sigan chupando perres de los y les trabayadores asturianes.
Ye por ello que dende la Xunta Estudiantil Asturiana vamos facer tolo que tea de la nuesa mano pa que l'Ayuntamientu d'Uviéu retire la sovención destinada a la Cátedra Alarcos, chiringuitu personal d'esti personaxe. Asina mesmo, puxaremos por un procesu de sanción, ya que creyemos inalmisibles les sos actitúes a la escontra del estudiantáu asturianu.
Basta yá de puestinos n'UniOvi; basta yá de discriminación; basta yá d'emplegar ayalguería pública na aculturización y la involución.
