Ta principiando un nuevu cursu, y con él un añu más, abondos casos de represión a les asignatures de Llingua Asturiana y Gallego-Asturiano. Son dalgunos los casos fechos públicos y denunciaos por distintos coleutivos, pero ye evidente qu'añalmente son munchos más los que nin siquier lleguen a sabese.
Na
escuela pública nun son pocos los institutos que siguen negando'l
deprendizaxe de les nueses llingües, cuyu papel nel modelu educativu ye
testimonial dafechu y optativu. Nel casu de la concertada, la
marxinación ye xeneralizada, siendo práuticamente anecdóticos los casos
d'escolinos que son quien a cursar la so llingua.
Dende
la Xunta Estudiantil Asturiana señalamos un añu más al gobiernu
asturianu, cola complicidá de los centros educativos implicaos, como
principales responsables de qu'otra vegada más se-yos vaya negar a
cientos d'escolines y escolinos el deprendizaxe d'asturianu y
gallego-asturiano, yá bien ruínu y marxináu de por sí.
Décades
depués de la introducción de l'asignatura nes escueles, non namái nun
s'avanzó haza una progresiva presencia vehicular del asturianu y el
gallego-asturiano nel nuesu enseñu, sinon que los ataques ya intentos de
facelo retroceder son evidentes. Poro, vamos siguir reivindicando un
enseñu en condiciones dignes y garantizáu de les nueses llingües, y
facemos un llamáu a toles y tolos afeutaos a nun callar la so situación,
y siguir lluchando pol nuesu drechu a una educación alcordies a la
realidá cultural y social del nuesu pueblu.
POR UN ENSEÑU PÚBLICU N'ASTURIANU Y GALLEGO-ASTURIANO
POLOS NUESOS DERECHOS
