El
próximu 1 de Mayu los y les estudiantes salimos a la cai xunto al restu
de la clase obrera asturiana pa continuar cola llucha poles nueses
reivindicaciones como tal, nuna Asturies onde la llucha faise
imprescindible pa siguir faciendo camín tresformador.
La
situación del enseñu públicu asturianu nun da pa munches
felicitaciones: a la LOMCE impuesta dende'l gobiernu central, súmense
los retayos adicionales impuestos dende la Conseyería del PSOE,
empiorando les condiciones d'alumnáu y profesoráu nes enseñances medies,
obligatories y non obligatories y calteniéndose en tou casu un modelu
que marxina o direutamente suprime toa visión apegada a la realidá
llingüística, histórica, cultural o social d'Asturies.
Na
Universidá d'Uviéu, amás de la imposición de nuevos numerus clausus o
les xubíes de tases, caltiénse un inxustu Reglamentu de Permanencia
qu'espulsa de les aules a 1099 alumnes y alumnos, frutu d'un Conseyu
Social opacu y mercantilizador de la nuesa enseñanza
y nel que tantu IU, como'l PSOE, como los sindicatos amarillos UGT y
CCOO voten nel mesmu sen y de la mano de patronal y Foro o PP escontra
los intereses de la mayoría social.
Y a ello, súmase una Estratexa Universidá 2015 que, con midíes como'l
3+2, va avanzar nesta problemática p'alumnáu, profesores y PAs si dende
l'estudiantáu asturianu nun somos quién a aparalo cola organización y la
llucha.
Poro,
faise imprescindible siguir saliendo a la cai y reivindicando el nuesu
drechu a un enseñu asturianu y popular, y l'espaciu de movilización que
consideramos afayaíza pol so calter combativu y popular ye la
manifestación entamada esti 1º Mayu por CSI, CGT y SUATEA, a les 12:30
na Plaza L'Humedal.
Dientro d'esta movilización va conformase'l bloque #LluchandoPolaSoberanía, nel que llamamos a participar considerándolu l'espaciu de calter xunitariu dientro de los coleutivos y persones que defenden la llucha obrera y estudiantil dende una visión soberanista.
¡Obreres y estudiantes, xuntes y p'alantre!
¡Puxa'l 1º de Mayu!
¡Puxa Asturies Llibre!
