Qué tristura que lo que ye una inxusticia pa unes, seya diversión pa otres; qué deceición dase cuenta de que la igualdá de drechos de la muyer ta bien lloñe de ser algamada. Dámonos cuenta de que si bien enantes el sometimientu de la muyer espresábase d'una forma mui nidia y evidente, agora en munchos casos ye indireuta, antroxada de llibertá, y que so la mázcara escuéndese una sumisión a un sistema patriarcal y entovía pior, a un sistema comercial, que busca na muyer unes carauterístiques más propies d'una cosa...
Exemplu d'esta sumisión ye'l cartelu qu'anuncia la renovena de químiques y que ronda les nueses facultaes. Esti tipu de cartelos faenos entender que la imaxe de la muyer, en munches vegaes con intereses sexuales, ye usada como reclamu p'algamar beneficios económico, como si d'un productu se tratare. Nesti casu concretu convidámosvos a señalar y refugar esti tipu de discriminaciones, esti maltratu social nun pue siguir.
Dende la Xunta Estudiantil Asturiana lluchamos escontra d'un sistema capitalista que mos cosifica, que mos pon preciu y que mos usa pal so enriquecimientu. Ta claro que la única solución pa facer desapaecer estes barbaridaes ye lluchar xuntes.
¡NON AL USU DE LA MUYER COMO OXETU! ¡PUXA LA LLUCHA DE LES MUYERES!
