La educación pública asturiana sigue sufriendo
ataques: a los retayos de personal, l'empioramientu de les condiciones
materiales nes aules, la marxinación activa de les llingües, cultura, realidá
social ya historia d'asturies, les dificultaes crecientes p'acceder a la
universidá pol aumentu de les tases, la mengua de les beques, o normes
restrictives como'l Reglamentu de Permanencia, tenemos
que sumar agora l'amenaza que supón el 3+2, afondando na mercantilización d'un
sistema educativu que lleva años caminando nesa direición, como bien amuesa una
LOMCE bien venceyada a estes polítiques.
Toos estos ataques tienen como protagonistes non
solo al gobiernu central, sinon tamién a un gobiernu asturianu que nun dulda en
recortar personal interín, condergar a esi estatus al profesoráu d'asturianu y
gallego-asturiano, o amosar una actitú de pasividá nunos casos y responsabilidá
direuta n'otros nel evidente deterioru de la Universidá d'Uviéu, tanto pa
profesores, como alumnos/es, y personal alministrativo.
Consideramos imprescindible caltener ya
intensificar la movilización: namái un movimientu reivindicativu, fuerte,
organizáu y apegáu a les problemátiques de la educación asturiana va poder
valtiar estes amenaces. Ye por ello que llamamos a la participación nes
movilizaciones del 24 marzu, pero dende una perspeutiva crítica, y coherente
colo espuesto: señalamos y denunciamos tamién la hipocresía de convocantes
activos de les protestes, como CCOO, UGT o CSIF, que demientres per un llau
llamen a participar contra'l 3+2, aprueben n'órganos como'l Conseyu Social de
la Universidá d'Uviéu, midíes qu'espulsen a más de 1000 alumnes/os, frutu d'un
Reglamentu de Permanencia inxustu y abusivu.
Poro, llamamos a la conformación d'un espaciu
críticu nes movilizaciones del 24M: críticu pa colos qu'ataquen l'enseñu
públicu, críticu pa cola hipocresía de los sos cómplices, y afitando qu'hai
otru camín p'algamar una educación pública asturiana de calidá.
