Manifestación del Bloque Críticu Estudiantil

Esti vienres 24 de febreru a les 17:00 dende la estación de Renfe d'Uviéu, manifestación del Bloque Críticu Estudiantil, por un enseñu anticapitalista y popular. Movilización estudiantil dende Asturies y dende la base:

“El peculiar conceutu hexemónicu de deprendizaxe […] presupón que les persones tienen que deprender mil coses que producen nelles, en munches ocasiones, indiferencia dafechu o, inclusive, refugu absolutu. Nun ye poco avezada la opinión que siñala que’l ser humanu ye curiosu por naturaleza y que, poro, deprender ye parte del so ser. Sicasí, paez que la naturaleza dio-y una curiosidá errática, ya que’l ser humanu tien, según paez, una incapacidá evidente pa deprender lo que tien que deprender. Esto ye lo qu’asoleya la realidá escolar, que marca non namái qué deprender, sinon tamién que deprender ye un don que la escuela apurre, polo que’l deprender pasa de ser una manifestación humana a una obligación institucional nes sociedaes contemporánees." - Héctor C. García y Alfredo Olmeda en Deprendiendo a obedecer. Crítica del sistema d’enseñu.

El capitalismu pasó per abondes crisis polítiques y económiques que foi quien a superar o, polo menos, a parchear gracies a les sos propies dinámiques recuperadores. Sicasí, paez qu’estes dinámiques yá nun pueden dar más de sí. La idea d’algamar siempres el máximu beneficiu ensin cuntar coles consecuencies sobre la Tierra y les sociedaes humanes, ta arrastrándonos al precipiciu. Pali que pali, el capitalismu avanza haza la so crisis terminal, nuna fuxida p’alantre fasta que too españe. Pesie’l mensaxe de recuperanza qu’emiten los seutores más lliberales y conservadores de la nuesa sociedá, los que nun vivimos na burbuya de l’alta sociedá, somos bien conscientes de cuál ye la realidá. El paru y la precarización del emplegu; la privatización y los retayos de servicios que, se supón, son drechos fundamentales nel Estáu de Derechu y del Bientar; la corrupción de les instituciones; la desigualdá social xorreciente que pon acaldía más en dulda’l mitu de la “clase media”; la explotación de la clas trabayadora pola clas dominante; el neocolonialismu y l’imperialismu cultural baxo’l nomatu de “globalización”; les migraciones masives; l’espoxigue del facismu, el deterioru del planeta, llegando a facer irrespirable’l so propiu aire… El capitalismu ta cavando la so propia tumba, pero nós nun somos los sepultureros, tamién tamos dientru d’esa tumba.

¿Qué papel xuega’l sistema educativu en tou esi tingláu? La obediencia y l’adoctrinación. “L’opresor nun sedría tan fuerte si nun tuviere cómplices ente los propios oprimíos”, dicía Simone de Beauvoir. Na escuela institucionalizao nun se fala d’estes coses (sacantes rares esceiciones) porque nun interesa, nun precisamos saber cómo furrula’l capitalismu pa desempeñar los nuesos futuros roles profesionales. Lo único que s’espera de nós tres pasar per tola cadena de montaxe de la fábrica escolar, ye que seyamos bonos trabayadores obedientes y sumisos, meros productos pa poner en venta nel mercáu llaboral. L’estudiu forciáu del estudiante tresfórmase nel trabayu alienáu del trabayador, y de la mesma mena que nun cuestionamos nin criticamos les coses que deprendemos, tampoco nos cuestionamos la nuesa función como pieces na cadarma que rixe la nuesa sociedá.

Nós nun pretendemos meyorar la escuela institucionalizada, nun pretendemos facer una escuela más “racionalizada” y “modernizada”, pues entendemos que la escuela furrula como un órgano más del capitalismu imperante, y si queremos destruyir el capitalismu pa construyir un mundo nuevu, tamién tenemos que destruyir el so sistema educativu.

Acudi col Bloque Críticu Estudiantil a la manifestación d’esti 24 de febreru a les 17:00 na estación de Renfe d’Uviéu.

¡Por una educación horizontal, autoxestionada y combativa!

Día de la Llingua Materna

Un añu más llega’l Día Internacional de la Llingua Materna y sigue siendo pa nós un día de reivindicación y llucha. Los nuesos drechos como falantes d’asturianu y gallego-asturianu siguen ensin ser respetaos, y non sólo eso, sinón que munches trabes y pilancos siguen poniéndosenos a diariu nel camín.

 

Siguimos teniendo un sistema educativu nel qu’estudiar na nuesa llingua materna nun ye posible. Por si fuere poco, la materia de llingua asturiana vese obligada a competir cola de cultura asturiana, como si nun fueren dambes ún de los pilares básicos de la formación de tou escolín en cualesquier país. El profesoráu de llingua sigue viviendo una situación llaceriosa, yá que dicha asignatura namás cumple una hora nel horariu selmanal de los institutos, y cualesquier profesor necesita cubrir un númberu mayor d’hores de docencia. Amás, vemos como munchos centros educativos siguen ensin cumplir la llei y nin siquier ufierten l’asignatura; mientres qu’otros, que sí la ufierten, inciten tanto a los pas como a los neños a a garrar otres llingües “con más futuru” que l’asturianu.

 

Agora bien, ¿cómo va tener futuru una llingua que ta sometía a tal nivel d’opresión y represión? Nun van namái décades, sinón sieglos, dende que los partidarios de l’aculturización y la uniformidá llingüística esfuérciense porque les nueses llingües desapaezan. Sicasí, ye llabor de la mocedá da-y la vuelta al tableru y ganar la partía. Nun podemos siguir tolerando que nos repriman, que nos torguen documentación, que nos pongan pilancos nes aules, que los medios ridiculicen la nuesa llingua amás de chupar sovenciones, que nos intenten acallar a tolos niveles de la nuesa vida. 

 

Ser falante d’una llingua ye daqué que forma parte de nós, que nos fai ver el mundiu dende una perspectiva que namái vamos compartir cola nuesa xente. Por ello, pol sentimientu d’unidá, pola nuesa cultura y tradición, porque tamos a favor de les llingües, de los collores, de la llibertá: güei y tolos díes desiximos la oficialidá del asturianu y el gallego-asturianu. Nel Día de la Llingua Materna convidamos a tol mundiu a falar, dexando de llau prexuicios y imposiciones, y lluchar xuntos polo nueso. ¡Que nun muerra!

¿Práutiques gratuites n'empreses? ENXAMÁS

Dende la Xunta Estudiantil Asturiana y Darréu ponemos en marcha una campaña empobinada a una problemática qu’afeuta direutamente a la mocedá del nuesu país, tanto a la estudiantil, como a la yá enxertada dafechu nel tarrén llaboral. 

Esta problemática nun ye otra que les práutiques non remuneraes n’empreses, una constante tanto p’alumnáu de Formación Profesional, como pal universitariu, anque como yá apuntábemos  ehí nun acaba la cuestión: la mocedá non estudiante tamién carez formes paecíes d’esplotación y abusu empresarial, al traviés de contratos en práutiques, pagos en negru, y en xeneral con un rangu profesional y salarial que nun suel correspondese col so facer real, afondando asina na precariedá llaboral y vital esperimentada pola inmensa mayoría de la xente mozo n’Asturies.

Dende una perspeutiva estudiantil, el nuesu refugu a esti tipu de práutiques tien unes razones mui concretes. No que toca a la nuesa conceición de lo que debe ser el sistema educativu, oponémonos a un enseñu que, como l’actual, tea al serviciu de les empreses. Nun se busca’l nuesu arriquecimientu personal nin la formación educativo, tampoco’l desendolcu de les nueses habilidaes y preferencies, simplemente la formación de mano d’obra cualificao a la par que barato, que sirva a empreses privaes nes que, como amuesen toles estadístiques, la mocedá asturiano nun atopamos más que precariedá y temporalidá.

Dende un puntu de vista más material ya inmediatu, esto tórnase en que nun se nos va retribuyir alcordies a la fuerza de trabayu que tamos apurriendo, y ye que más alló de la formación  llaboral que se nos dea nel centru de trabayu, ye evidente que nel periodu total de práutiques resultamos rentables económicamente pa les empreses implicaes. Sicasí, nun ye solo eso: amás de nun cobrar pol nuesu trabayu, na mayoría de casos nin se nos paguen los gastos de tresporte (pueden mandate de práutiques a una empresa de fuera’l to conceyu), nin de xinta nos casos que seya necesario, etc. Esto paeznos bien poco compatible y bien incoherente pa con un sistema educativu que se diz “públicu y gratuitu”, espeyando que nes condiciones d’anguaño, namái les empreses salen ganando col sistema de práutiques esistente.

Too esto enllaza perbién col panorama xeneral que l’empresariáu ufre a la mocedá asturiano: condiciones de temporalidá y precariedá afayaíces pa que’l beneficiu patronal seya’l máximu posible. Y si puede ser a coste cero, meyor. Nesi sen, son abondos los casos de mocedá asturiano trabayando con contratos en práutiques que nun s’axusten a la so situación real, yá que na práutica desendolquen la so xera como cualquier otru trabayador. La desplicación: el beneficiu empresarial a costa de la nuesa precariedá.

Que’l nuesu país tea a la tiesta del Estáu español n’emigración forciada de la mocedá, nun ye casualidá: nun se da namái polo complicao que resulta atopar un puestu de trabayu cualesquier, sinon qu’a eso hai que sumar les males condiciones de les ufiertes esistentes. Un 92% de temporalidá media nos nuevos contratos firmaos n’Asturies dende va años, con una media xeneral de temporalidá mayor que la estatal; la cayida salarial d’un 33% nos últimos 7 años pa la mocedá pente 18 y 25 años;  el requisitu mediu de 3 años d’esperiencia nes ufiertes de trabayu, o’l posicionamientu d’Asturies nos últimos puestos de mocedá activo nel mercáu llaboral, son dalgunos de los munchos datos que sofiten lo evidente: n’Asturies la mocedá nun tien posibilidaes d’un futuru llaboral dignu, y en consecuencia nun tien posibilidaes d’una vida digno nel nuesu país.

Y énte too esto, ¿qué facer? Dende la Xunta Estudiantil Asturiana y Darréu, como organizaciones qu’asumen Asturies como’l so marcu nacional d’actuación, consideramos que ye perimportante la concienciación y la movilización de la mocedá, a nivel estudiantil y a nivel xeneral. Quedó yá bien claro que’l tarrén institucional nun va trayer nenguna conquista nin meyora que nun esixamos y algamemos la mocedá organizao nes cais, nos centros de trabayu, y nos centros d’estudiu. Ye por ello perimportante amosar cuestiones concretes a reivindicar y a consiguir, ensin escaecer que’l camín ye tresformar la sociedá.

-          -NON A LES PRÁUTIQUES NON REMUNERAES: Como esixencia inmediata, puxamos por que se cubran los gastos derivaos de la formación nos centros de trabayu, y que se retribuya’l nuesu trabayu. Anque se disfrace de formación académico, bien sabemos que na práutica la xera desarrollada ye llaboral y xenera un beneficiu patronal. En consecuencia, tien que ser remunerada nunes condiciones dignes. 

-          -POR UN SISTEMA EDUCATIVU AL SERVICIU DEL PUEBLU: Más alló de reivindicaciones inmediates pal sistema actual, vamos siguir lluchando por un futuru nel que’l sistema educativu asturianu nun tea baxo los parámetros capitalistes, ye dicir: que nun se mueva baxo’l criteriu de la rentabilidá económico nin de formar entes productivos, sinon que sirva pa la realización individual dientro d’un proyeutu coleutivu con valores como la solidaridá, l’espíritu críticu, la igualdá, y en definitiva,” la non esplotación del home pol home”, atendiendo al contestu específicu del nuesu país.

-            -ESPLOTACIÓN, TEMPORALIDÁ, PAGU EN NEGRU… VALIÓ DE PRECARIEDÁ: Les práutiques non remuneraes son namái una esfera más de la llaceriosa situación vivía pola mocedá asturiano no llaboral. Reclamar los nuesos derechos como trabayadores ye imprescindible, y organizanos ye’l camín: tamos fartes d’hores estra non pagaes, de salarios de miseria, de nun poder emancipanos y desendolcar una vida digno n’Asturies. Los culpables, tán bien claros: gobiernu y patronal. Por un marcu asturianu de rellaciones llaborales nel que la mocedá cunte con un papel d’especial importancia pola gravedá de la so situación, y nel que la clase trabayadora cunte colos mecanismos d’esixencia y negociación qu’impidan les coacciones y abusos patronales avezaos. 

-         - POR UN FUTURU N’ASTURIES: Son munchos años de dexadez institucional énte les esixencies de la mocedá. La situación de dependencia y pasividá na que s’alcuentren les instituciones autonómiques y conceyiles del nuesu país namái va poder camudase frayando dafechu les dinámiques esistentes. 

Ye’l momentu d’un verdaderu plan de choque nel que’l seutor públicu seya protagonista na xeneración d’emplegu xuvenil, que tien de ser inescusablemente estable y de calidá. Yá valió de planes conceyiles que, pola so temporalidá y precariedá, nun son más que parches y llavaos de cara. Yá valió d’una Conseyería de Trabayu que, menos dánoslu, fae de too. 

La igua a tolo amosao, ta bien clara: superar el sistema capitalista y el marcu llaboral, xurídicu, social, educativu… que lu acompaña, y al mesmu tiempu la irrenunciable soberanía del pueblu trabayador asturianu pa que la mocedá del nuesu país puea cuntar con soluciones propies pa los sos problemes propios, y pa que tolos ámbitos del nuesu país tean organizaos y desarrollaos alcordies coles necesidaes y enfotos de la so xente.

Ye por too ello polo que dende la Xunta Estudiantil Asturiana y Darréu entamamos una campaña cola qu’asperamos que les reivindicaciones teóriques y práutiques del estudiantáu y de la mocedá en xeneral sigan avanzando na urxente y necesaria igua a les sos problemátiques y esmoliciones.

Folixa d'autoxestión

Ta acabando un añu enllenu de lluches y reivindicaciones, nel que tamién tien qu'haber tiempu pa la folixa. Esti sábadu 17 d'avientu nun te pierdas dende les 19:30 la folixa nel Llar La Llegra: bona musiquina, precios populares... y los beneficios dirán destinaos a l'autoxestión de nueves actividaes y campañes del movimientu estudiantil soberanista pal añu que ta por llegar.

¡Esperámoste! ;-)

La so constitución, la nuesa dignidá

COMUNICÁU DE LA PLATAFORMA "PARA LOS PUEBLOS"

Diz el refrán que les pallabres llévales el vientu. Pero pal estáu español, paez qu'unes pallabres pesen más qu'otres. Magar a los y les nacionalistes españoles enllénase-yos la boca falando d'unos supuestos derechos sociales que vienen escritos na constitución española, escaecer de que na práctica, nun son más que papel moyáu col que los gobiernos y empreses privaes pueden faer negocios como quien viende un quilu de mazanes nel mercáu del so pueblu. Sicasí, nesi folletu políticu qu'ellos y elles llamen “Constitución” hai palabres que pesen como unos grilletes, los grilletes del estáu español. Porque lo que consideren “la unidá d'España”, esi malditu encargu que ciertu dictador fascista que del so nome nun queremos nin alcordanos, convirtióse nun mantra que repiten una y otra vegada y col que pretenden xustificar un terrorismu d'estáu cada vez más presente, por desgracia, nos pueblos encarcelaos pol estáu español.