Como
venimos apuntando dende cuantayá, son milenta los motivos pa que
l'estudiantáu asturianu salga a les cais. La LOMCE, llexislada y
pensada dende Madrid, sigue imponiéndose o dexándose d'imponer
n'Asturies con total sumisión del gobiernu asturianu, y ensin atender
nenguna de les reivindicaciones que dende l'estudiantáu, el profesoráu,
y les más y pás, vienen faciéndose en refugu d'esta llei
mercantilizadora y aculturizadora.
Nesi
sen, esti 24 de Payares hai convocada una nuea fuelga por parte'l SE,
na que la XEA insiste en 3 puntos básicos y diferenciadores respeuto a
les formes y el fondu convocante:
1)
Dende la XEA puxamos por un enseñu fechu y pensáu pol pueblu asturianu
y pal pueblu asturianu, y anque nun negamos qu'unes lleis educatives
feches pol Estáu español pueden ser meyores qu'otres, el nuesu enfotu
ta en construyir un enseñu asturianu, llibre d'élites que faigan y
desfaigan en perxuiciu'l pueblu.
2)
Por muncho que valtiemos "lleis franquistes", nun va haber nenguna
reforma especialmente bona dientro de la lóxica capitalista. La
educación nel capitalismu enxamás va ser igualitaria, emancipadora,
participativa... poro, la crítica de fondu al sistema económicu y
políticu paeznos fundamental.
3)
Fuelgues aleatories, feches por cumplir l'espediente anual d'actividá,
y que nun cunten cola totalidá del texíu estudiantil asturianu, faen
más mal que bien a una ferramienta irrenunciable como ye la fuelga.
Una vegada más, nun podemos tar d'alcuerdu coles formes de convocatoria
nin cola estratexa xeneral de la organización convocante: insistimos
na necesidá de construyir movimientu estudiantil plural, de base y
diariu.
Con
too ello, la Xunta Estudiantil Asturiana considera que nenguna ocasión
ye mala pa salir a les cais a lluchar y reivindicar, fechu
qu'aprovecharemos amás pa siguir faciendo trescalar nel estudiantáu
asturianu la necesidá d'autoorganizase y avanzar haza otru modelu de
llucha. Amás, consideramos qu'esa xera tien de ser amplia y plural, como
lo ye'l propiu movimientu estudiantil, con quien los convocantes, una
vegada más, nun cuntaron pa nada.
En
consecuencia, dende la XEA tornamos a faer un llamáu a participar nel
Bloque Críticu Estudiantil esti xueves a les 12:00 na Plaza España. Esti
BCEst, del que participamos xunto con otres organizaciones y persones,
ye una bona espresión d'unidá dende la diversidá, atalantando la
importancia de construyir ente toes y toos el movimientu estudiantil
qu'Asturies precisa.
