Dende'l movimientu
estudiantil asturianu que trabaya dende la XUNTA ESTUDIANTIL ASTURIANA,
volvemos a manifestanos nuna fecha tan importante como lo ye la Selmana
de les Lletres Aturianes. Enxamás vamos arrenunciar a la llucha por una
causa xusta como lo ye la dignidá de toos y toes les que queremos vivir
n'igualdá independientemente de la llingua qu'escoyamos. Lluchemos,
lluchamos y vamos siguir faciéndolo tolos díes del añu ensin fincar la
rodiella nin dar un pasu atrás ante los ataques criminales dende
posiciones de poder de la xente que detenta el poder y namás mira pal so
porgüeyu.
A
nivel educativu, persábese la precaria situación a la que someten a los
y les estudiantes. Los vuestros fíos y fíes, amigos y amigues; los que
queremos un futuru dignu pa la xente que quier vivir y trabayar nesti
país del norte. Les asignatures de Llingua Asturiana y Gallego-Asturianu
tienen un númberu abondosu de matriculaciones, pero los intereses
políticos d'una minoría privilexada y aculturadora intenta tapecela.
Intenta aprovechar la desigual situación política d'un campu nel que, de
ser oficial, xeneraría una cantidá enforma grande de puestos de trabayu
que permitiría l'espoxigue cultural d'un país oprimíu como Asturies.
La posibilidá de facer un futuru xuntos y xuntes.
La posibilidá de formar parte de dalgo mayor qu'aiciones aisllaes y descoordinaes.
Intenten
acabar con nosotres, pero ye en vano. Nós resistimos y, pasu ente pasu,
con cada pequeña aición dientro d'un marcu mayor, va llegar el momentu
nel que, a toa esta xentecaya retrógrado nun-y va quedar otra qu'asumilo
y quedar atrás.
Hai
futuru n'Asturies, porque tolos que lluchamos y aunimos esfuerzos nesti
país tamos preparaos pa ello. Nun escaecemos a los y les compañeres
obligaes a emigrar pa vivir na precariedá nel estranxeru, nun escaecemos
a la xente qu'aportó'l so granu de sable nel pasáu nin tampoco
escaecemos a los que piensen que ye necesario facer, organizase y
recuperar la soberanía robada poles élites oligopóliques del Estáu
español n'Asturies.
Siempre
se sorrayen los errores y "derrotes" pa desactivar el movimientu
soberanista asturianu. Fáenlo porque tienen mieu y porque saben que
tenemos razón. Saber que nosotres tenemos la razón, pa ellos, ye
peligroso. Asturies necesita recuperar la soberanía nacional, la
soberanía social, la soberanía popular, pa que'l nuestru futuru
decidámoslu toos y toes, xuntos y xuntes. L'enseñu ye'l pasu primeru pa
poder algamar una tresformación social a un país más xustu, un país pa
los que menos tienen. El nuestru.
Dende
la XUNTA ESTUDIANTIL ASTURIANA compartimos con tola sociedá'l nuesu
ideal —en potencia y de facto— de que nun hai meyor manera d'algamar los
oxetivos de la sociedá asturiana que faciendo bloque colos que daveres
puxen, #LluchandoPolaSoberanía.
D'esa manera, ponse una fueya de ruta con un oxetivu perclaru a tolos
niveles, entamando pel educativu. Perriba de lluches eleutoralistes
ayenes y polítiques mirando a Madrid, ensin improvisar, pa recuperar a
la xente qu'emigró forzao y pa poner enriba la mesa un proyeutu sólidu
de la sociedá asturiana que respuenda a lo que quier daveres.
Les
élites socioeconómiques del Estáu español que detenten el poder
n'Asturies creyen problemátiques sociales, llingüístiques, llaborales,
polítiques y, en xeneral —porque ye d'ónde pue xurdir too— educatives.
Saben que los individuos formaos, conscientes del so pasáu y presente,
tienen la fuerza pa construyir el so futuru.
SI TE PROHIBEN FALAR,
FALA
SI TE PROHIBEN ESTUDIAR N'IGUALDÁ
¡LLUCHA!
¡POR UN ENSEÑU PÚBLICU, CALIDABLE, ASTURIANU
Y N'ASTURIANU!
OFICIALIDÁ
L'ASTURIANU LLINGUA OFICIAL
