Los próximos 13 y 14 d’abril tán convocaes dos xornaes de fuelga
estudiantil a nivel estatal, sobre les que dende la XEA queremos amosar el
nuesu posicionamientu y perpeutives.
En primer términu, consideramos que son munches les razones poles que
les y los estudiantes d’Asturies tienen que salir a la cai: por una LOMCE que
nun podemos parar de refugar hasta la so muerte definitiva; por un enseñu
públicu que nes etapes primaries y secundaries ta cada día pior nel nuesu país
(pieslles de centros, estudiantes en barracones, falta de profesoráu…), por una
Formación Profesional acaldía más pensada por y pa l’empresariáu, y non pa les
persones; y por un enseñu universitariu alloñáu de la realidá del país tanto
nel planu académicu, como nel social, o nel cultural.
Pero non too queda na simple oposición a esti tipu d’agresiones: tamién
creyemos imprescindible reivindicar en positivo la defensa del calter públicu
del sistema educativu, un enseñu que tien qu'avanzar inevitablemente nel camín
de convertise nuna ferramienta igualitaria, emancipadora, llaica, popular, y
pegada a la realidá social, cultural y a la hestoria del nuesu país, Asturies.
Nesi sen, paeznos qu’una vegada más, va afrontase una convocatoria de
fuelga pensada y diseñada dende fuera d’Asturies y dende la pirámide d'una
estructura organizativa, polo que nun atiende nin a les necesidaes, nin a los
ritmos, nin a les problemátiques concretes del estudiantáu asturianu, y
qu’amuesa a les clares la necesidá de siguir avanzando nunes dinámiques y
calendarios propios que dea un sentíu real y efectivu a les lluches,
organizándonos dende la base y en cuantos más centros d'enseñu.
El movimientu estudiantil tien que ser una ferramienta ACTIVA y
DINAMIZADORA, non una organización inmovilista y pasiva que namás que se dedica
a facer convocatories de fuelga ensin nengún otru tipu d'actividaes nin de
crítica el restu l'añu. Pa ser motor de cambiu y de tresformación social,
l'estudiantáu tien que frayar coles movilizaciones de calter
"festivu” y ensin nenguna planificación de futuru, camudándolo pol
trabayu diariu de base nel camín de la concienciación y la organización
constante del estudiantáu asturianu.
Ye por ello que dende la Xunta Estudiantil Asturiana vamos movilizanos
estos díes, igual que’l restu del añu, pero dende una perspeutiva crítica: nun
apoyamos la imposición de convocatories centralistes, unilaterales, y carentes
d’una base plural y apegada a la realidá asturiana. Sicasí, taremos presentes
nes movilizaciones y lluches d’estos dos díes col oxetivu principal de siguir
espardiendo nel estudiantáu asturianu estes cuestiones mínimes que plantegamos
nes llinies anteriores.
¡¡¡POR UNA EDUCACIÓN PÚBLICA Y ASTURIANA!!!
¡¡¡¡¡ASTURIES SÁLVASE LLUCHANDO!!!!!
