A lo llargo de los díes 13 y 14 d'abril, coincidiendo cola convocatoria estatal de fuelga estudiantil, dende la XEA aprovechamos pa treslladar al estudiantáu la necesidá d'avanzar haza un movimientu estudiantil tresformador, de base (fechu nel trabayu diariu, en cada centru d'estudiu, horizontalmente) y apegáu a la realidá cultural, social, hestórica, etc del nuesu país, Asturies.
Nesi sen, como yá treslladábemos con anterioridá, nun coincidimos y criticamos les formes centralistes, unilaterales, y folclorizantes del SE nes sos convocatories de fuelga, pensaes dende Madrid y ensin cuntar con nengún otru sector del movimientu estudiantil. Poro, espeyamos éstes cuestiones, asina como una reivindicación en positivu de los nuesos valores, al traviés d'aiciones diverses, como pancartes en dellos centros d'educación secundaria y universitaria d'Asturies.
De la mesma manera, tamién tuviemos presentes na manifestación del xueves 14 n'Uviéu, onde amás de participar con pancarta y banderes pola lliberación nacional, social y de xéneru, espardimos un cientu de pasquinos afitando tolo citao en rellación al movimientu estudiantil en sí, y tamién les nueses propuestes y reivindicaciones pal enseñu asturianu.
Dende la XEA siguimos trabayando acaldía por algamar una educación del pueblu y pal pueblu, siguimos #FaciendoCamín, ¡y la to participación ye imprescindible!
