Nestes
dos xornaes de llucha estudiantil, les estudiantes asturianes salimos a
la cai pa amosar el nuesu refugu a la implantación de les nueves midíes
neolliberales nel nuesu sistema educativu, como son la Estratexa
Universidá 2015 y el 3+2; sin escaecer tampoco la llucha escontra'l
Reglamentu de Permanencia de la Universidá d'Uvieu y escontra la LOMCE y
col fin d'algamar un enseñu asturianu, públicu, de calidá y de baldre.
Dende les organizaciones de la dinámica #ParaLosPueblos
convoquemos a toles estudiantes de los pueblos oprimiós a una xornada de llucha el 26F, de la que posteriormente intentó apropiase el
Sindicatu d'Estudiantes de manera centralista y unilateral, ensín tener
en cuenta les dinámiques y les realidaes de cada pueblu.
Atendiendo a
la coordinación internacional y col fin de lluchar escontra estes
midíes privatizadores les estudiantes de la Xunta Estudiantil Asturiana y
les de les Asamblees d'Estudiantes de la Universidá d'Uviéu, sofitaos
por otros sindicatos y colectivos sociales asturianos, decidimos
confluir nuna manifestación el díi 25 de Febreru.
Manifestación 25F
El
miercoles 25 una gran representación de la sociedá crítica asturiana
salió a les cais d'Uviéu a sofitar la llucha estudiantil estudiantil
escontra el 3+2 y el Reglamentu de Permanencia de la Universida d'Uviéu,
aprobáu pol Conseyu Social, formáu por grandes empresaries, sindicatos
del poder y partíos politicos, y sofitáu fonderamente pol PSOE y la so
responsable de política universitaria Miriam Cueto. Esti reglamentu
criminal ye el culpable de que, solo nesti añu, 1099 estudiantes fueren
espulsaes de la Universidá d'Uviéu por nun cumplir con unos requisitos
desproporcionaos, que nun permiten compaxinar los estudios cola vida
llaboral, o nun tienen en cuenta les persones con problemes personales o
familiares.
Nesta
manifestación axuntaronse mas de mil persones que recorrieron Uviéu
dende la estación del Norte, hasta llegar al edificiu históricu de la
Universidá d'Uvieu, onde tuvo llugar la llectura del manifiestu y
posteriormente algunes compañeres quedaron encerraes pa siguir
discutiendo formes de lluchar escontra les midíes neolliberales y el
Reglamentu de Permanencia.
El
xueves 26 de febreru foi turnu de la xornada de fuelga, a la que
llamábemos dende la Xunta Estudiantil Asturiana. Foi una xornada na que
siguir afondando na axitación y la propaganda de les causes y
reivindicaciones que mos lleven a llamar a la movilización, cola
colocación de delles pancartes n'institutos y campus, repartu
d'información, etc.
Posteriormente,
a les 12 de la mañana, la XEA conformó un bloque críticu estudiantil na
manifestación con salida na Plaza La Catedral, al entender que los
nuesos plantegamientos y alternatives, choquen coles posiciones y
práutiques de la organización convocante, el Sindicato de Estudiantes,
pero yera al mesmu tiempu imprescindible facer ver al estudiantáu les
alternatives esistentes.
Asina,
glayáronse reivindicaciones como "Escuela pública y de calidá",
"Escuela asturiana y popular", "Asturies sálvase lluchando", y otros
glayíos venceyaos a les reivindicaciones estudiantiles, a la necesidá de
lluchar, a lo imprescindible d'una Asturies soberana ya igualitaria, o a
la situación de les llingües propies nel enseñu y nel país en xeneral.
Remató
con ello una intensa xornada de llucha, precedía por otres tantes de
trabayu previu nel que la Xunta Estudiantil Asturiana amosó qu'hai otra
forma d'entender el movimientu estudiantil asturianu.
