Nun aparen los ataques al estudiantáu asturianu, tanto dende un gobiernu central que sigue enfotáu na aplicación de midíes qu’afonden nel retrocesu de la educación pública, como d’un gobiernu asturianu que va más allá ya intensifica los recortes de personal docente ya alministrativu, o nes condiciones materiales de los centros educativos, perriba de lo esixío dende Madrid. Esti procesu de mercantilización y privatización de la universidá nun ye nuevu, primero col Plan Bolonia y agora cola Estratexa Universidá 2015, faciendo que la nuesa educación tea cada vegada más al serviciu de los intereses del mercáu y de les grandes empreses.
Midíes como'l 3+2 –Enxertaes na EU 2015- conlleven la rebaxa a 3 años del gráu y l’aumentu del máster a 2, agrandando d'esta manera'l preciu de la carrera pa llegar al mesmu nivel de conocimientu que s'algamaba cola llicenciatura. Amás, cola nueva planificación, les universidaes pierden la so autonomía, ya que tamién van insertase los "Mecenas" p'ayudar na financiación de la Universidá. Éstos van poder escoyer dellos cargos de les mesmes, condicionando con ello los conocimientos que vayan a impartise y afondando asina nel nefastu modelu del mal nomáu Conseyu Social escontra'l que venimos lluchando les estudiantes de la Universidá d'Uviéu
A la Estratexa Universitaria 2015 hai qu’amestar los efectos d'una LOMCE –“Llei Wert”- yá en furrulamientu, y qu'ente otres cuestiones, condiciona dende bien pronto’l futuru de les y los escolinos, y afita diferencies ente centros según les notes algamaes. Amás, como bien reconocía’l propiu ministru, afóndase na “españolización” del estudiantáu, con una educación cada vegada más alloñada de la realidá social, hestórica, cultural o llingüística de los pueblos que conformamos l’Estáu español.
Consideramos que toes estes polítiques formen parte d’unos mesmos planes pa la progresiva elitización y mercantilización del enseñu, con un modelu educativu inxustu, non igualitariu y con un accesu cada vegada más restrictivu pa la clas obrera. Ye imprescindible siguir saliendo a la cai, lluchando polos nuesos drechos, y por ello llamamos a participar la fuelga educativa del 24 marzu #Fuelga24M
Dende la XEA vamos siguir #FaciendoCamín p'algamar una educación pública, popular, asturiana, non heteropatriarcal, emancipadora, crítica y llaica. De los pueblos y pa los pueblos.
NIN EU2015 NIN LLEI WERT
3+2 NON
EDUCACIÓN PÚBLICA Y ASTURIANA