Dende la naciente XUNTA ESTUDIANTIL ASTURIANA queremos asoleyar el
nuesu sofitu a la Fuelga Xeneral del enseñu convocada pa esti xueves 9
de mayu, animando los y les estudiantes de la Universidá d'Uviéu a
sofitala apoyando les movilizaciones previstes pa esa xornada en defensa
d'una educación pública, asturiana y de calidá.
Entendemos que la
nueva contrarreforma qu'impulsa'l Gobiernu central per aciu de la LOMCE
supón un nuevu ataque frontal a la educación pública, con un claru
enfotu ideolóxicu que beneficia a les clases pudientes, la Ilesia y
l'estatus quo de la partitocracia españolista, aplaudida y sofitada
poles élites polítiques asturianes qu'inda güei siguen refugando un
modelu educativu espécificu p'Asturies. Esta reforma ye una #Wertgoña porque:
• En pallabres del impulsor, Jose Ignacio Wert, pretente españolizar a
los y les estudiantes con midíes consistentes en somorguiar y tapecer
les estremaes cultures y llingües esistentes dientro de les llendes del
Reinu d'España, como ye'l casu de l'asturiana, afondando nuna visión
distorsionada de la diversidá cultural del mundu: foméntense llingües y
cultures de primer orde, llamaes a ser útiles y positives; mentanto se
viende qu'otres llingües y cultures han desaniciase pal progresu social
d'una comunidá humana. Tristemente dende'l gobiernu d'Asturies nun se
respuende a esti ataque direutu a la nuesa personalidá hestórica como
pueblu diferenciáu sinón que calteniendo les sos polítiques
aculturizadores y glotocides foron de los pocos gobiernos autonómicos
que nun tando en manes del Partido Popular nun llevantaron la voz.
• Supón un nuevu avance privatizador por mor del empeoramientu de la
calidá que suponen el recorte en medios materiales y humanos y
l'afondamientu na precarización de sectores como'l profesoráu interín,
la masificación de les aules y la desapaición de centros d'enseñanza nes
zones rurales del país. Al mesmu tiempu, afítase la política de
conciertos, con centros principalmente relixosos, onde adoctrinen a los
estudiantes llegando incluso a separtar la educación d'homes y muyeres
como ye'l casu de los colexos del OPUS DEI n'Asturies.
• Supón
una mercantilización dao qu'atalanta la educación como una mercancía
cualquiera, introduz rankings de competencia ente centros y criterios
puramente económicos na so xestión, llegando incluso a eliminar aquellos
qu'atalanta que nun son rentables y primando amás penriba la formación
académica real una formación meramente competitiva económicamente,
poniendo en manes de los famosos mercaos el sistema educativu. Dende la
XEA consideramos que la escuela ha tar al serviciu y los intereses de la
sociedá; poro, esta triba criterios economicistes hemos refugalos
dafechu a la fin de construyir una escuela pública popular.
• Son
la tresllación a la educación primaria y secundaria de les reformes nel
ámbitu de la educación superior, que suponen el plan Boloña y la
EU2015. La xuba de tases, la desapaición de les beques, la entrada de
les empreses financieres y otres grandes corporaciones nel gobiernu de
la universidá pública son solo dalgunes de les consecuencies más
visibles d'esti procesu de privatización y elitización de la universidá a
los que dicimos NON.
Nós:
• Defendemos y vamos trabayar
por un modelu educativu tresversal, multidisciplinariu y integrador
coles dinámiques sociales qu'arrodien escueles, insitutos y universidá,
onde la diversidá seya un valir a defender y non un problema a atacar.
• Lluchamos por un modelu pedagóxicu democráticu y participativu que
s'alloñe de les ríxides estructures tradicionales y qu'empobine a una
escuela lliberadora tanto socialmente como nacionalmente que forme
ciudadanos llibres.
Dende la XUNTA ESTUDIANTIL ASTURIANA
defendemos una educación universal, pública y gratuita a tolos niveles,
que tenga por finxu investigar y aportar conocimientos a la sociedá na
que s'inxerta y que nun tea al serviciu d'intereses particulares. Una
educación pública enfotada nes persones y na so capacidá de tener
pensamientu críticu y autónomu, como pegoyu básicu del progresu humanu
dientro d'una sociedá ensin dengún tipu d'opresión, desigualdá o
inxusticia.
Tenemos motivos más que de sobra pa refugar esti
nuevu ataque al enseñu públicu en xeneral y a la escuela pública
asturiana en particular. Por eso, dende la XUNTA ESTUDIANTIL ASTURIANA
llamámoste a ti, estudiante asturianu/a, a que participes na Fuelga
Xeneral del Enseñu güei xueves 9 mayu. Convidámoste a venir a con nós a
la manifestación que va salir de la estación de RENFE d'Uviéu a les 18
hores.
Precisamos que l'estudiantáu asturianu tea coordináu pa
poder responder afayadizamente a los ataques orquestaos dende'l Gobiernu
d'España y del Gobiernu d'Asturies que combaya con él.Ye por eso que
naz la XUNTA ESTUDIANTIL ASTURIANA y que vamos celebrar la nuesa
Asamblea Fundacional el prósimu viernes 24 de mayu nel edificiu
hestóricu de la Universidá d'Uviéu, a la que convidamos a tolos/es
estudiantes d'Asturies.
