Dende la Xunta Estudiantil Asturiana amosamos el nuesu sofitu a la
fuelga xeneral educativa convocada pa güei xueves 24 d'ochobre.
Atalantamos que les midíes mercantilizadores y d'afondamientu nel papel
adoctrinador de la educación son intolerables, polo que señalamos
públicamente al gobiernu español en Madrid y n'Asturies como principales
responsables d'esti procesu de desaniciu de los servicios públicos y
nesti casu, de la devaluación continua de la educación de toos y toes.
Nel presente cursu siguimos viendo cómo se piesllen escueles rurales y
cómo se-yos torga'l tresporte públicu a munchos escolinos perxudicando a
families enteres por criterios que solo afecten a les clases populares
de la sociedá, poniendo otra piedra asina nes polítiques de marxinación y
progresivu despoblamientu de grandes faces de toa Asturies. Del mesmu
mou y como denunciaron recientemente coleutivos polos derechos civiles y
llingüísticos, son milenta les persones que nun puen siquiera
matriculase na asignatura de llingua asturiana nos IES del país y
cientos les escolines a les que nun se-yos imparte escontra la so
voluntá, porque'l gobiernu del que se autodenoma "socialista", Javier
Fernández, refuga contratar al personal docente necesariu pa cubrir los
derechos educativos de los y les estudiantes.
Igualmente, la
financión a la Universidá d'Uviéu mengua d'añu n'añu col preste de los
partíos políticos presentes na Xunta Xeneral combayando colos
empresarios colos que comparten asientu nel muérganu xestor de la
Universidá, que ye'l Conseyu Social. Mentanto, a miles d'estudiantes
universitaries se-yos ta robando'l futuru por nun poder enfrentase al
costu xabaz de les tases académiques y l'endurecimientu del réxime de
permanencia, el sistema de concesión de beques o, inclusive, la
reducción de los conteníos imprescindibles pa una preparación rigurosa
nes carreres universitaries. Esto nun tien otra fin qu'escluyir del
sistema educativu públicu superior a les persones que nun puedan
permitise pagar un carrera y comer tres veces al día, empobinándoles a
un destín precariu, homoxenizador, a la emigración a la que'l gobiernu
español n'Asturies yá somete a la xente mozo y a los y les trabayadores
del nuesu país ensin miramientu dalu.
Poro, encamentamos a toles
estudiantes a sofitar la fuelga y a salir esta tarde con nós peles cais
d'Uviéu na manifestación que de magar les 18:00 percorerrá la ciudá
dende la Estación del Norte.
Sicasí, les formes nes qu'esta
fuelga foi convocada y l'ausencia d'análisis de la realidá asturiana nun
nos permite participar xunto a la convocatoria oficial de la xornada,
polo que la Xunta Estudiantil Asturiana acudirá a la manifestación al
final del too como señal de protesta y de denuncia del papel que cumplen
les grandes centrales sindicales d'ámbitu estatal y el Sindicatu
d'Estudiantes. Apostamos pola creación nun futuru próximu d'espacios
d'alderique y coordinación real de la comunidá educativa asturiana que
trabayamos por otru modelu social pal nuesu país.
¡Amuesa'l to refugu a les polítiques educatives privatizadores, españolistes, sexistes, ultrarrelixoses y capitalistes!
¡POR UNA EDUCACIÓN PÚBLICA AL SERVICIU DE LA SOCIEDÁ Y CULTURA ASTURIANA!
¡NON A LA LOMCE!
